စတော့ဈေးနှုန်းများကို မည်သည့်အကြောင်းများက ပြောင်းလဲစေသနည်း

ရင်းနှီးမြှုပ်နှံသူတို့ စိတ်ဝင်တစားမေးမြန်းသည့် အချက်တစ်ခုမှာ မည်သည့်စတော့ကိုဝယ်လျှင် ကောင်းမည်နည်း၊ စတော့ဈေးနှုန်းများကို မည်သည့်အကြောင်းများက ပြောင်းလဲစေနိုင်သနည်းဟူသည့် မေးခွန်း ဖြစ်ပါသည်။ စတော့ဈေးနှုန်းများကို နွားသိုးဈေးကွက်နှင့် ဝက်ဝံဈေးကွက်ဟူ၍ တင်စားပြောကြသော်လည်း ယင်းတို့၏ အဓိပ္ပာယ်အမှန်မှာ တက်နေသောဈေးကွက်နှင့် ကျဆင်းနေသော ဈေးကွက်တို့ကို ပြောဆိုခြင်း ဖြစ်ပါသည်။ ယေဘုယျပြောရလျှင် တစ်ကမ္ဘာလုံးနှင့် ပြည်တွင်းစီးပွားရေး အခြေအနေများ ကောင်းနေသည့်အချိန်တွင် စတော့ဈေးများ တက်၍ စီးပွားရေးကျဆင်းနေသည့် အခြေအနေတစ်ရပ် သို့မဟုတ် အခြားသော စီးပွားရေးအကျပ်အတည်းများ ဖြစ်နေသည့်အချိန်တွင် စတော့ဈေးနှုန်းများ ကျဆင်းတတ်ပါသည်။

ဂလိုဘယ်လိုက်ဇေးရှင်းဖြစ်စဉ်ကြီးတွင် နိုင်ငံပြင်ပရှိ စီးပွားရေးစွမ်းဆောင်ချက်တစ်ခုသည် ပြည်တွင်းသို့ လျင်မြန်စွာ ကူးစက်စေပါသည်။ ဥပမာ အမေရိကန်၏ စီးပွားရေးကိုအာရုံစိုက် လေ့လာကြည့်ရန် လိုအပ်ပါသည်။ အဘယ့်ကြောင့်ဆိုသော် နိုင်ငံအတော်များများသည် အမေရိကန်နှင့် ကုန်သွယ်မှု မိတ်ဖက်များဖြစ် နေသောကြောင့်ဖြစ်သည်။

အမေရိကန်၏ စီးပွားရေးအင်အားတောင့်တင်းမှုသည် မိတ်ဖက်နိုင်ငံများ၏ ပို့ကုန်တန်ဖိုးကို မြင့်တက်စေကာ ပြည်တွင်းစတော့ဈေးကွက်များအတွက် ကောင်းမွန်သောအခွင့်အလမ်းများကို ဖြစ်ပေါ်စေပါသည်။

ရင်းနှီးမြှုပ်နှံသူများအနေဖြင့်ဘဏ္ဍာရေး သတင်းအချက်အလက်များကို လေ့လာဖတ်ရှုရန် လိုအပ်ပါ သည်။ အထူးသဖြင့် အမေရိကန်စီးပွားရေးအခြေအနေနှင့်ဒေါင်ဂျုန်းစ်စက်မှုအညွှန်းကိန်းတို့ကို ဖတ်ရှုရန် လိုအပ်ပါသည်။ ယေဘုယျအားဖြင့် အညွှန်းကိန်းတက်နေသည့် ကာလတွင် အမေရိကန် စီးပွားရေးအခြေအနေမှာ ကောင်းမွန်နေသည်ဟုတွက်ဆနိုင်ပြီး အဆိုပါ အညွှန်းကိန်း ကျဆင်းနေသည့်အချိန်သည် အခက်အခဲတစ်ခုခုနှင့် တွေ့ကြုံနေရချိန်ဟု မှတ်ယူနိုင်ပါသည်။ ဒေါင်ဂျုန်းစ်အညွှန်းကိန်းသည် ပြည်တွင်းစတော့ဈေးကွက်အတွက် အရေးပါသောအချက်ပြစနစ်နှင့် ရင်းနှီးမြှုပ်နှံသူတို့၏ သဘောထားနှင့် ခံစားချက်ကို ထင်ဟပ်စေသော ကိန်းတစ်ခုဖြစ်ပါသည်။ ဥပမာ နယူးယော့ခ် စတော့အိတ်ချိန်း (Wall street) ၁၉၈၇ ခုနှစ်၊ အောက်တိုဘာလတွင် ပြိုကွဲခဲ့စဉ်က စင်ကာပူစတော့အိတ်ချိန်း၏ Strait Times Industrial Index အညွှန်းကိန်းမှာ ၁,၄ဝဝ အမှတ်မှ ၈ဝဝ အမှတ်အထိ ကျဆင်းသွားခဲ့သည့် သာဓကရှိခဲ့ပါသည်။

ပြည်တွင်းစီးပွားရေး အခြေအနေ။ ။ နိုင်ငံတစ်ခု၏ စီးပွားရေး အခြေအနေကို တစ်မျိုးသားလုံး၏ ပြည်တွင်းအသားတင်ထုတ်လုပ်မှုတန်ဖိုး (GDP) ဖြင့်တိုင်းတာပါသည်။ ယေဘုယျအားဖြင့် တိုင်းပြည်စီးပွားရေး ကောင်းမွန်ပါက GDP တိုးတက်မှုနှုန်း မြင့်တက်ကာ စတော့ဈေးကွက်တွင်လည်း အပေါင်းလက္ခဏာဆောင်သော တိုးတက်မှုများကို ရရှိစေပါသည်။ ဥပမာ စင်ကာပူတွင် ၁၉၉၂ ခုနှစ်၊ အောက်တိုဘာလအတွင်းစတော့ ဈေးများတက်ခြင်း၏ ရလဒ်ကြောင့် နိုင်ငံ၏ စတုတ္ထသုံးလပတ်၏ GDP တိုးတက်မှုနှုန်း ၇ ဒသမ ၄ ရာခိုင်နှုန်း ဖြစ်ပေါ်ခဲ့ပါသည်။ ဆက်လက်၍ စတော့ဈေးကွက် အားကောင်းလာခဲ့ကာ နိုင်ငံ၏ စီးပွားရေးတိုးတက်မှု ဂဏန်းနှစ်လုံးရလာခဲ့ပြီး ၁၉၉၃ ခုနှစ်တွင် ၁ဝ ဒသမ ၁ ရာခိုင်နှုန်းအထိ တိုးတက်လာခဲ့ကြောင်းတွေ့ရပါသည်။ ထို့ကြောင့် နိုင်ငံ၏ GDP သည် ရင်းနှီးမြှုပ်နှံသူတို့အတွက် အဓိကချဉ်းကပ်ရာ အညွှန်းကိန်းတစ်ခု ဖြစ်လာခဲ့ပါသည်။

နိုင်ငံအများစုတွင် စီးပွားရေးကိန်းဂဏန်းများဖြစ်သည့် GDP နှင့် အခြားသောအရေးပါသည့် ကိန်းဂဏန်းများကို သတင်းစာနှင့် မီဒီယာများတွင် အပတ်စဉ် ထုတ်ပြန်လေ့ရှိပါသည်။ အဆိုပါ အစီရင်ခံစာများမှ မည်သည့်စီးပွားရေးကဏ္ဍသည် စွမ်းဆောင်မှု အားကောင်းနေသနည်း။ တိုးတက်မှု အလားအလာမည်မျှရှိနေ သနည်း ဆိုသည်ကိုဖတ်ရှုလေ့လာကာ စတော့တစ်ခုကို ဝယ်ယူရန်ဆုံးဖြတ်ရာတွင်လည်း အဆိုပါအားကောင်းနေသော စီးပွားရေးကဏ္ဍနှင့်သက်ဆိုင်သည့် စတော့များကို ဝယ်ယူခြင်းဖြင့် အကျိုးများနိုင်မည် ဖြစ်ပါသည်။ ဥပမာ အိမ်ခြံမြေကဏ္ဍ ဆိုးရွားစွာ ကျဆင်းနေသည့်အချိန်တွင် သင့်အနေဖြင့် အိမ်ခြံမြေလုပ်ငန်း လုပ်ကိုင်သည့် စတော့များကို မဝယ်ယူမိစေရန် သတိပြုရမည်ဖြစ်သည်။ အခြားသောအသုံးဝင်သည့် ကိန်းဂဏန်းများမှာ လုပ်ငန်းဆောင်ရွက်မှုစရိတ်များ၊ ကုန်ပစ္စည်း ထုတ်လုပ်နိုင်မှုအားနှင့် အတိုးနှုန်း အခြေအနေများဖြစ်ပါသည်။

ငွေဖောင်းပွမှုနှုန်း။ ။စီးပွားရေးအခြေအနေများ ကောင်းမွန်နေပါက စတော့ဈေးကွက်သည်လည်း ကောင်းမွန်စွာ လည်ပတ်နေမည်ဖြစ်ပါသည်။ စီးပွားရေးတစ်ခုသည် အရှိန်ပြင်းပြင်းနှင့် မြင့်တက်နေမည်ဆိုပါက တစ်ချိန်တွင် ရှေ့ဆက်တိုး၍ မရတော့သော တန့်သွားသည့် အခြေအနေတစ်ခုသို့ ရောက်သွားနိုင်ပါသည်။ အဆိုပါ စီးပွားရေးအခြေအနေမျိုးကို အပူချိန်လွန်ကဲသော စီးပွားရေးစနစ်ဟုခေါ်ဆိုပြီး ယင်း၏နောက်ဆုံးရလဒ်မှာ ငွေဖောင်းပွမှုနှုန်း မြင့်မားခြင်းပင်ဖြစ်သည်။ အထက်တွင် ဖော်ပြခဲ့သည့်အတိုင်း စတော့တစ်ခု၏ ဝယ်လိုအားမှာ ကုမ္ပဏီတစ်ခု၏ ဝင်ငွေအလားအလာ ကောင်းမွန်မှုအပေါ်တွင် မူတည်ပါသည်။ သို့အတွက် ငွေဖောင်းပွမှုဖြစ်နေသည့်ကာလများတွင် အဆိုပါ ကုမ္ပဏီ၏ အမှန်ဝင်ငွေနှုန်းမှာ လျော့နည်းသွားစေမည် ဖြစ်ပါသည်။ သို့အတွက်စတော့များ၏ ဝယ်လိုအားမှာ ကျဆင်းသွားပြီး စတော့ဈေးနှုန်းမှာလည်း လိုက်ပါကျဆင်းသွားမည် ဖြစ်ပါသည်။ ထို့ကြောင့် အမြော်အမြင်ရှိသော ရင်းနှီးမြှုပ်နှံသူများသည် ငွေဖောင်းပွမှုနှုန်းဖြစ်ပေါ်လာနိုင်သည့် အရိပ်အယောင်များကို ကြည့်ရှုခန့်မှန်းကြပြီး အကယ်၍ ငွေဖောင်းပွမည့်လက္ခဏာတွေ့ရှိပါက အဆိုးဆုံးသို့မရောက်မီ မိမိတို့၏ စတော့များကို ထုတ်ရောင်းကြမည်ဖြစ်သည်။ ဤမျှအရေးပါလှသော ငွေဖောင်းပွမှုနှုန်းကို အဘယ်သို့ ခြေရာခံပါမည်နည်း။

နိုင်ငံရေး အခြေအနေများ။ ။ စတော့ဈေးကွက်သည် ဒေသတွင်း၊ နိုင်ငံတွင်းနှင့် အပြည်ပြည်ဆိုင်ရာ နိုင်ငံရေး အခြေအနေများနှင့် တိုက်ရိုက်ပတ်သက်လျက် ရှိပါသည်။ ဥပမာ ၁၉၉ဝ ပြည့်နှစ်၊ သြဂုတ်လ၌ ဖြစ်ပွားခဲ့သည့် ပင်လယ်ကွေ့ပြဿနာတွင် တစ်ကမ္ဘာလုံးဆိုင်ရာ စတော့ဈေးကွက်များ ထိုးကျခဲ့ရသည်။ ယင်း၏ ဂယက်က စင်ကာပူ Strait Times Industrial Index အညွှန်းကိန်းကို ၁,၅၅၇ အမှတ်မှ ၁,၁၂၇ သို့ အမှတ် ၄ဝဝ ကျော် ကျဆင်းစေခဲ့ကြောင်းသိရသည်။

ကုန်စည်ဈေးနှုန်းများ။ ။ ရေနံ၊ စက်သုံးဆီ၊ ရော်ဘာ၊ သံနှင့်သံမဏိအစရှိသည့်ကုန်စည်များသည် ကုန် ထုတ်လုပ်ငန်းများနှင့် ဝန်ဆောင်မှုလုပ်ငန်းများအတွက် အခြေခံအကျဆုံး ကုန်စည်များဖြစ်ပါသည်။ အဆိုပါ ကုန်စည်ဈေးနှုန်းများ မြင့်တက်ပါက ထုတ်လုပ်မှုနှင့် ဝန်ဆောင်မှုစရိတ်များ မြင့်တက်လာမည် ဖြစ်သည်။ ထို့ကြောင့် အထက်ပါ ကုန်စည်အများစု၏ ဈေးနှုန်းများ တက်လာပါက ငွေဖောင်းပွမှုနှုန်း မြင့်တက်လာနိုင်ကာ စတော့ဈေးကွက်တွင် ပါဝင်သူများအနေနှင့် ဂရုစိုက်ရမည့်အချိန်ဖြစ်ပါသည်။

အတိုးနှုန်းများ။ ။ အတိုးနှုန်းအတက်အကျသည် ကောင်းမွန်သော အညွှန်းကိန်းတစ်ခုဖြစ်ကာ ယင်းကို နိုင်ငံစီးပွားရေး ထိန်းကျောင်းသည့် လက်နက်တစ်ခုအဖြစ်၊ ငွေဖောင်းပွမှုကို ထိန်းကျောင်းသည့် လက်နက် တစ်ခုအဖြစ် အသုံးချနိုင်ပါသည်။ ငွေဖောင်းပွမှုကို ထိန်းချုပ်လိုပါက အတိုးနှုန်းကို မြှင့်တင်လိုက်ပြီး ချေးငွေ စရိတ်များကို မြင့်တက်သွားစေအောင် ဖန်တီးလိုက်ပါသည်။ ချေးငှားသောစရိတ် မြင့်တက်လာပါက စီးပွားရေးလုပ်ငန်းများ၏ ရင်းနှီးမြှုပ်နှံမှုနှင့် ထုတ်လုပ်မှုစရိတ်များ မြင့်တက်လာကာ လုပ်ငန်းများ နှေးကွေးလာပါမည်။ ယင်းအခြေအနေတွင် စီးပွားရေး တိုးတက်မှုနှုန်းသည်လည်း ကျဆင်းလာကာ ငွေဖောင်းပွမှုကို ထိန်းချုပ်နိုင်သည့် အနေအထားသို့ ရောက်ရှိလာပါသည်။ အတိုးနှုန်းသည် ငွေဖောင်းပွမှုနှုန်း မြင့်တက်ခြင်း၏ အချက်ပြစနစ်တစ်ခု ဖြစ်ရုံမျှမက စတော့ဈေးကွက်အတွက် စောင့်ကြည့်ရမည့် ကိန်းတစ်ခုလည်းဖြစ်ပါသည်။ အတိုးနှုန်း နိမ့်ကျနေသည့် အခြေအနေတစ်ခုတွင် ငွေဖောင်းပွမှုနှုန်းမှာလည်း နိမ့်ကျပြီး နိုင်ငံစီးပွားရေးတည်ငြိမ်နေသော အချိန်တစ်ခုတွင် စတော့ဈေးကွက်သည် ပို၍ သွက်လက်လေ့ရှိပါသည်။ ဘဏ်အပ်ငွေများမှ အတိုးဝင်ငွေနည်းပါးစွာ ရရှိသည့်အတွက် ရင်းနှီးမြှုပ်နှံသူအများစုမှာ ၎င်းတို့၏ ငွေကြေးများကို ပြန်ရနှုန်းမြင့်မားမှုသည့် စတော့ရှယ်ယာများ ဝယ်ယူလိုကြပါသည်။ ထို့ပြင် ငွေချေးငှားမှုနှုန်းများ သက်သာခြင်းကြောင့် ရင်းနှီးမြှုပ်နှံသူတို့အတွက် ထုတ်လုပ်မှုစရိတ်သက်သာစွာ ရင်းနှီးမြှုပ်နှံနိုင်ကြမည်ဖြစ်ပါသည်။ ဤသို့စတော့ဈေးကွက်၏ တွန်းအားများကို အတိုးနှုန်းနည်းပါးမှု၊ မြင့်တက်မှုများမှ အရင်းခံလာခြင်းဖြစ်ရာ အတိုးနှုန်းမြင့်တက်မည်၊ ကျဆင်းမည်ဟူ သောသတင်းကို စတော့သမားများ၊ သုတေသီများက အစဉ် နားစွင့်နေရမည်ဖြစ်ပါသည်။

အထက်၌ ဖော်ပြခဲ့သည့် အချက်များအပြင် စတော့သမားများအနေနှင့် သတင်းမီဒီယာများတွင် ပုံမှန် ထုတ်ပြန်လျက်ရှိသည့် ဘဏ္ဍာရေးသတင်း အချက်အလက်များကိုမျက်ခြည်မပြတ် လေ့လာနေရန် လိုအပ်ပါ သည်။ ပို၍အရေးကြီးသည့်အချက်မှာ နိုင်ငံ့စီးပွားရေး စဉ်ဆက်မပြတ် ဖွံ့ဖြိုးတိုးတက်မှု (sustainable growth) ရှိမရှိ သုံးသပ်ရန် ဖြစ်ပါသည်.

စာရေးသူ ထွန်းသက်ထွန်း
http://www.thetradetimesmedia.com မှ ကူးယူဖော်ပြပါသည်။